هو ايه اللي بيحصل في فلسطين؟؟ مش فاهم حاجة .. (مقال طويل آخر .. وأكثر مللا .. معلش)

(((((مقال فى غايه الخطوره والاهميه))))
د.تامر حسن يكتب
________________
هو ايه اللي بيحصل في فلسطين؟؟ مش فاهم حاجة ..
(مقال طويل آخر .. وأكثر مللا .. معلش)
***************************************
أنا ممكن أصدق ان حماس فجأة كده وعلى سهوة افتكرت ان فيه حاجة اسمها اسرائيل بعد ما كانوا عايشين في صمت وهس هس طول الفترة اللي فاتت .. وإن فيه انتفاضة فلسطينية بتحصل دلوقتي ضد العدو الصهيوني الغاشم المحتل ..
.
.
ومش ممكن أنسى العداء التاريخي الأزلي بيننا وبين اسرائيل . ولا ممكن ننسى القضية الفلسطينية وشعب فلسطين المستباحة أرضه ..
.
.
بس الزمن علمني .. ان اللي يتاجر بالدين ويستعمله .. ممكن يتاجر و يستعمل أي حاجة تانية .. حتى القضية الفلسطينية .. ومش كل واحد لبس شال كاروهات و اتغطى بيه واتصور وهو ماسك الألي ورافع الصوباعين وكاتب الله أكبر بقا مجاهد ضد اليهود والصهاينة ..
.
.
يعني لما تيجي كتائب القسام تقصف حيفا ومطار بن جوريون بشماريخ وبمب العيد اللي سموهم صاروخ الرنتيسي و صاروخ الجعبري .. وتسمي العملية (العاشر من رمضان) .. وكمان بمنتهى البجاحة تهديها لمين؟؟ لشهداء الجيش المصري؟؟؟ الجيش المصري اللي شبعوا فيه قتل وتفجيرات؟؟ لا يا راجل؟؟؟؟ داحنا نبقى بندق عصافير لا مؤاخذة ..
.
.
الناس مرتبكة .. ومتلخبطة .. مش عارفة نقف مع حماس علشان خاطر القضية الفلسطينية برغم كل اللي عملوه في الجيش .. ولا انشالله يولعوا في بعض واللي يمد ايده على جيشي ويطول لسانه على بلدي زيه زي الصهيوني مايفرقش ..
.
.
الناس مش عارفة يا ترى اللي بيحصل ده انتفاضة بجد ولا تمثيلية عاملاها اسرائيل و حماس علشان يجرجرونا لحرب مالناش فيها ومش وقتها؟؟
.
.
أقولكوا في رأيي ..
.
.
طبعا الأمور لا تدار بهذه السذاجة ان حماس تقعد على ترابيزة مع اسرائيل و يتفقوا ان حماس تخطف 3 جنود و تقتلهم و اسرائيل ترد بقصف غزة تقوم حماس تضرب صواريخ على حيفا و تل أبيب .. الموضوع أعقد من البساطة والسذاجة دي بكتير ..
.
.
الحكاية وما فيها ان منظومة الإمبراطورية العصبجية الدولية برعاية أمريكا .. اللي حكيتلكوا عنها قبل كده .. لقت ان مصر نفدت من مخطط الخراب .. ولكنهم استمروا في المقاوحة عن طريق التفجيرات و القنابل و العمليات الخايبة ..
.
.
ومع انتشار حملات القبض على تلك الخلايا .. وعمليات تطهير سيناء .. وسيطرة مصر على حدودها الغربية و الجنوبية .. وغلق معبر رفح .. السلاح بيقل .. والرجالة بتقل .. والفلوس بتقل .. وكده مش هاينفع .. لازم نهرب شوية فلوس و سلاح و تكفيريين في سيناء ..
.
.
تروح الإمبراطورية العصبجية دي تدي الأوامر لحماس .. التابع الأمين دلوقتي .. عايزين كام عملية خفيفة كده في اسرائيل .. ويمولوها .. وبعد ما تتم يسيبوا اسرائيل ترد .. وتدبح في الشعب الفلسطيني الغلبان ..
.
.
والشباب السخن الجميل يهيج أوي و ينفعل مع الإنتفاضة و يضرب الشال الكاروهات ويغير صورة البروفايل ويمكن ينزل يعملله وقفة احتجاجية تتروج في الإعلام الدولي انه غضب واحتقان شعبي شديد في مصر ..
.
.
والضغط الدولي على مصر يزيد .. افتحوا معبر رفح يا كفرة .. فيه مصابين و جعانين وعريانين في غزة .. ولا فلسطين دي ملهاش حد يسأل فيها .. بنفس طريقة الإخوان في التجارة بالدين بالحرف الواحد ..
.
.
مصر هاتقول لأ .. مش هافتح المعبر .. يطلع السلاح السحري .. طب سددي الديون اللي عليكي يا قطة وعايزينها على داير المليم .. ايه؟؟ مش قادرة تسددي؟؟ طب ماتعمليش فيها ستين راجل وافتحي المعبر يا حلوة ..
.
.
هو ده اللي بيحصل بالحرف .. فيلم هندي لفتح ثغرة لتهريب مزيد من السلاح و الأموال و المخدرات و التكفيريين لمصر .. علشان الرصيد قرب ينفذ .. لإنهم عارفين ان مصر عمرها ما هاتتجرجر عسكريا للدخول في معركة زي دي مهما اتمارس ضغط من الإخوان و النوشتاء على الجيش والسيسي بحجة (مسافة السكة) ..
.
.
القضية الفلسطينية على راسي .. لكن المتاجرين بيها و بيستغلوها لضرب بلدي على جزمتي .. القضية المصرية أولا .. أمن الوطن أولا .. والديون لازم تتسدد بقا .. بالذوق بالعافية تتسدد مهما جعجع المجعجعون وتاجروا بالفقراء والغلابة علشان محدش يتحكم فينا أكتر من كده ..
.
.
يا ترى فهمت يابو السلاطين ولا لسه؟